මෝලි 1 - Molly

අදත් තව මාළු වර්ගයක් අරගෙන ආවා. මේ වර්ගයේ නම "මෝලී". මුනුත් පැටවු මගින් බෝවෙන විෂේශයක්. කෙටියෙන්ම කිව්වොත් ලයිව්බෙයාරස් වර්ගයක්. මීට කලින් පැටවු මගින් බෝවෙන ගප්පි, ප්ලේටි හා ස්වෝර්ඩ්ටේ ගැන කතා කලා මතක ඇති නේ. අද අන්තිම වර්ගය !

අන්තිම වර්ගය කිව්වේ ලයිව්බෙයාරර්ස්ලා ඉවර නෑ. ප්‍රධාන වර්ග 4ක් ගැන විතරයි මම මුලින්ම කතා කරන්නේ. ඊට පස්සේ බිත්තර මගින් බෝවෙන වර්ග ගැන ලිපි ලියන්නයි බලාපොරොත්තු වෙන්නේ.පස්සේ පස්සේ මතක් වෙන හැටියට ලයිව්බෙයාරර්ස්ලා ගැන ලියන්නම්.

පොඩි කාලේ අපි මුන්ට "මෝරීස් " කිව්වට මුන්ගේ ඇත්තම නම තමයි "මෝලි" !
හරි එහෙනම් වැඩේට බහිමු...



සාමාන්‍ය නාමය - මෝලි
විද්‍යාත්මක නාමය -  Poecilia sphenops
සාමාන්‍ය දිග - ගැහැනු මසුන් අඟල් 4ක  දිගින් යුක්ත වන අතර පිරිමි මසුන් අඟල් 6ක  දිගින් යුක්ත වේ.
නිජබිම - මධ්‍යම ඇමරිකාව
හිතකර උෂ්ණත්වය -  සෙල්සියස් අංශය 25 ත් 28ත් අතර

මෝලි මසුන් සර්ව භක්ෂක මත්ස්‍යය ගණයට අයත් වේ. එම නිසා මොවුන් නිවිති,ඇල්ගී වර්ග , ජලජ පාසි හා පැලෑටි වර්ග වැනි ශාක වර්ගද මදුරු කීටයින් හා කුඩා කෘමි වර්ගද ආහාරයට ගනී.  එසේම මෙම මසුන් ඉතාම සාමකාමි මාළු විශේෂයක් නිසා විවිධ මසුන් වර්ග සමග ඒකම ටැංකියක ඇති කල හැකිය.

තවද මෙම මසුන් ඇති කිරීම සඳහා  අවම වශයෙන් ගැළුම් 5ක 10කවත් ටැංකියක් තිබිය යුතු ය. පිරිමි හා ගැහැනු මෝලි මසුන් වෙන් කර හඳුනා ගත හැක්කේ ගුද වරලෙන් හා පිට වරලෙන් ය.පිරිමි මසුන්ට දිග ගුද වරලක් පිහිටන අතර ඉතා විශාල පිට වරලක් පවතී. පිට වරල පිම්බීමෙන් තම අභිමානය පෙන්වීමද පිරිමි මසුන් විටින් විට සිදු කරයි.ගැහැනු සතුන්ගේ ගුද වරල කුඩා වන අතර පිට වරලද විශාලව නොපිහිටයි.

අනිත් ලයිව්බෙයාරර්ස් වර්ගයට අයත් මසුන් සේම මෝලි වර්ගත් පැටවුන් මගින් බෝවෙන මසුන් වර්ගයකි. ගැහැනු මෝලි මත්සයෙකු වරකට පැටවු 10 සිට 100ක ප්‍රමාණයක කුඩා මසුන් ගණනකට එකවර ජීවය ලබා දිය හැකිය. එලෙසම ගැහැනු මෝලි මත්සයෙකුගේ ශරීරය තුල පිරිමි මත්ස්‍ය ශුක්‍රානු තැන්පත් කර ගැනීමේ හැකියාව පවති.

මේ නිසා එක වරක් පැටවු දැමු මෝලි මත්සයෙකුට නැවත වරක් පිරිමි මාළුවෙකුගේ සහයක් නොමැතිව පැටවුන් දැමිය හැකිය.මෝලි ගැහැනු සතෙකුගේ සාමාන්‍ය ගර්භනී කාළය දවස් 21ත් 28ත් අතර කාළයක් ගනී. එලෙසම මෝලි මත්සයින්ටද ගප්පින්ට සේම පැටවු ප්‍රසූත කර පැය කිහිපයකට පසු නැවත ගර්භනී වීම සදහා දේහය හැඩ ගැසීම සිදුවේ.

වැදගත්ම කාරණය වන්නේ පැටවුන් බිහිවූ පසු මවු මෝලි මත්සයාව පැටවුන්ගෙන් වෙන් කල යුතු වීමය. නැත්නම් මවු මත්සයා පැටවුන්ව ආහාරයට ගැනීම සිදුවේ.අළුත උපන් මෝලි පැටවෙකු හොදින් මේරු මෝලි මත්සයෙකු බවට පත්වීම එසේත් නැත්නම් පැටවු බිහිකල හැකි මත්සයෙකු බවට පත්වීම සදහා මාස 6ක කාළයක් ගත වේ.

මෝලි මත්සයෙකුගේ සාමාන්‍යය ආයු අපේක්ෂාව අවුරුදු 3ත් 5ත් අතර කාළයකි. රැකබලා ගැනිම හා පෝෂ්‍යදායි ආහාරපාන යන කාරණා මත මෙම කාළය අඩු හෝ වැඩි විය හැකිය.

 වෙනදා වගේම ඊලඟ ලිපියෙන් මෝලි වර්ග ගැන පින්තූර බලමු.

එහෙනම් ගිහින් එන්නම්.
ජය වේවා !